Kostako zaie gure gazteak eramatea, abenduak 8, denok Durangora!

Badira bi hilabete 40 gazte independentistaren aurkako epaiketa hasi zela Madrilgo Auzitegi Nazionalean. Hasieratik gazteok argi genuen ezin genuela epaiketa hau oharkabean eta borrokatu gabe utzi. Horregatik erabaki genuen hainbat ekimen antolatzea: epaiketaren sustrai politikoa gizarteratu eta justizia espainiarraren zilegitasun eza salatu, torturatzaileak seinalatu, mobilizatu, desobedientzia tresnatzat hartuz.

Azken ildo honen barnean gutako lauk epailearen aurrean ez agertzea erabaki genuen. Ezkutatu egin ginen Estatuaren ankerkeria ikustarazteko. Horretarako, gure herri eta hirietako egunerokotasunean parte hartu nahi izan dugu. Horren adibide dira egin ditugun agerraldi ezberdinak.

Baina desobedientzia guztion ardura da. Auziperatu guztiona, eta epaiketa politikoekin amaitu nahi badugu, gizarte osoarena ere bai. Desobedientziak, errealitatea aldatzeko gai izango bada, masiboa eta herrikoia izan beharra dauka. Ez gutxi batzuena soilik, ez adituen edo gazteon kontua.

Horretarako bide bat zabaldu nahi dugu gazte auziperatuok Durangon, abenduaren 8an. Igande horretako goiz eta eguerdi partean, Durangoko kaleetan, tabernetan eta liburu eta disko azokako postuetan ibili nahi dugu. Zuokin batera, Durangoko giro zoragarriaz gozatu nahi dugu. Baina noski, ez dugu atxilotuak izan nahi, gure ekimena ez dugu amaitutzat eman nahi oraindik. Polizia atzetik dugu ordea.

Gu mozorro desobedientearekin jantzita joango gara. Baina gu soilik bagaude mozorrotuta, gureak egin du. Asko bagara ordea, haienak egin du.

Tresna hau Euskal Herriko txoko guztietara zabaltzea zure esku ere badago. Zenbat eta gehiago izan, zenbat eta gehiagok erabili tresna hau, zenbat eta gehiagok  sakondu desobedientzian, orduan eta gertuago izango dugu Euskal Herri librea izango dugun eguna.

Desobedientziaz libre bizi nahi dugulako, zuen babesa eta konplizitatea beharrezkoa dugu. Beraz, abenduaren 8an, eskuratu zure kamiseta laranja, egin zure maskara laranja. Jantzi mozorro desobedientea!

Aupa zuek!